नाशिक: नाशिक येथील भोंदूबाबा अशोक खरात याच्याविरुद्ध सुरू असलेल्या लैंगिक शोषण आणि फसवणुकीच्या प्रकरणाचा तपास करण्यासाठी राज्य सरकारने विशेष तपास पथक (SIT) स्थापन केले आहे. या SIT च्या प्रमुखपदी धडाडीच्या आयपीएस (IPS) अधिकारी तेजस्वी सातपुते यांची नियुक्ती करण्यात आली आहे. तेजस्वी सातपुते यांनी १९ मार्च २०२६ रोजी नाशिकमध्ये पोहोचून या तपासाची सूत्रे हाती घेतली. त्यांच्या नेतृत्वाखाली १२ अधिकाऱ्यांचे पथक या प्रकरणाचा तपास करत आहे. शनिवार दि. २१ मार्च रोजी तेजस्वी सातपुते यांच्या उपस्थितीत अशोक खरातची तब्बल ७ तास सखोल चौकशी करण्यात आली. यावेळी खरात आणि त्याचा सहकारी नीरज जाधव यांना समोरासमोर बसवून प्रश्न विचारण्यात आले.
खरातच्या फार्म हाऊस आणि निवासस्थानावरील छाप्यात पोलिसांनी ५८ आक्षेपार्ह व्हिडिओ, २ लॅपटॉप, पिस्तूल, काडतुसे आणि ८ लाख रुपयांची रोकड जप्त केली आहे. तपासात खरातच्या नावावर सुमारे ५२ सातबारा उतारे आणि १५०० ते २००० कोटी रुपयांची मालमत्ता असल्याचे समोर आले आहे. यामध्ये नाशिक, अहिल्यानगर आणि शिर्डी परिसरातील जमिनींचा समावेश आहे. खरातवर भारतीय न्याय संहिता (BNS) च्या कलमांनुसार बलात्कार, लैंगिक शोषण आणि ‘महाराष्ट्र नरबळी व इतर अमानुष, अनिष्ट व अघोरी प्रथा आणि जादूटोणा प्रतिबंधक कायदा‘ अंतर्गत गुन्हे दाखल करण्यात आले आहेत. तेजस्वी सातपुते यापूर्वीही अनेक संवेदनशील प्रकरणांत SIT प्रमुख म्हणून काम पाहत आहेत. त्यांच्या या नियुक्तीमुळे पीडित महिलांना न्याय मिळेल, अशी अपेक्षा व्यक्त केली जात आहे.
