चहू वेदी जाण षट्शास्त्री कारण। अठराहि पुराणे हरिसी गाती ॥। मंधुनी नवनीता तैसे घे अनंता। वाया व्यर्थ कथा सांडी मार्ग ।। एक हरि आत्मा जीव शिव समा वायां तू दुर्गमा न घालि मन ।। ज्ञानदेवा पाठ हरि हा वैकुंठ। भरला घनदाट हरि दिसे ।।
अभंगाचा भावार्थज्या हरिचे निर्गुण स्वरुप जाणण्याचा चारी वेद प्रयत्न करतात, जो हरि षट्शास्त्रांच्या निर्मितीचे कारण आहे व ज्या हरिचे अठरा पुराणे गुणगान करतात, त्या हरिला, ज्याप्रमाणे दह्याचे मंथन करून लोणी काढतात त्याप्रमाणे, प्राप्त करून घे व बाकीच्या व्यर्थ गोष्टी व मार्ग यांचा त्याग कर. एक हरिच आत्मा आहे व जीवशिव रुपाने तोच आहे, हे जरी तत्वत: खरे असले तरी या दुर्गम-अवघड विषयात तू विनाकारण मन वालू नको. ज्ञानदेव म्हणतात, हरिपाठाने मला सर्वत्र हरिच घनदाट भरलेला दिसत असल्यामुळे हा भूलोक मला प्रत्यक्ष वैकुंठच झाला आहे.
// जय जय राम कृष्ण हरी //
