मसुरे प्रतिनिधी: मसुरे देऊळवाडा येथील वयोवृद्ध ग्रामस्थ मोहन परब यांचा रस्त्यामध्ये पडलेला मोबाईल मसुरे येथील दैनिक तरुण भारतचे पत्रकार दत्तप्रसाद पेडणेकर यांना मसरे बाजारपेठ येथील रस्त्यावर सोमवारी पडलेला मिळाला होता. मिळालेल्या मोबाईल मूळ मालकाचा शोध घेऊन दत्तप्रसाद पेडणेकर यांनी प्रामाणिकपणे सदर मोबाईल मोहन परब यांच्याकडे बुधवारी सकाळी सुपूर्द केला. सध्याच्या जमान्यामध्ये प्रामाणिकपणा विरळ होत असताना पत्रकार दत्तप्रसाद पेडणेकर यांनी दाखविलेला प्रामाणिकपणा मसुरे गावामध्ये कौतुकाचा विषय ठरला आहे. मोहन परब यांची परिस्थिती अतिशय बेताचीच असल्यामुळे हरवलेला मोबाईल मिळाल्यामुळे मोहन परब यांना अत्यंत आनंद झाला. मोबाईल पाहता क्षणी मोहन परब यांच्या डोळ्यात आनंदाश्रू उभे राहिले. मोबाईल चेवयोवृद्ध मालक मोहन परब यांनी दत्तप्रसाद पेडणेकर यांना मनःपूर्वक आभार व्यक्त करून त्यांच्या प्रामाणिकपणाचे कौतुक केले.
