सावंतवाडी: महाराष्ट्र राज्य परिवहन महामंडळाच्या सर्व बसेस पेडणे ( गोवा ) बसस्थानकावरून जात असल्याने सकाळच्या वेळी कामावर जाणाऱ्या प्रवाशांची गैरसोय होत असून त्यामुळे बससेवा सरळ मार्गे सुरू करावी, अशी मागणी सिंधुदुर्ग जिल्ह्यातील जनतेकडून करण्यात येत आहे.
पेडणे ( गोवा ) येथील रस्ता अरुंद व एकेरी मार्ग असल्याने समोरून बस किंवा इतर वाहने आल्यास त्या वाहनाला बाजू देईपर्यंत भरपूर उशीर होतो. त्यामुळे मुख्य महामार्गांवर बस व इतर वाहनांना यायला बराच कालावधी लागतो.
पेडणे ( गोवा ) येथून प्रवाशांना इतर बसेसची सोय असल्याने एसटी बसचे उत्पन्न वाढत नसल्या कारणाने महाराष्ट्र राज्य परिवहन महामंडळ कणकवली ( सिंधुदुर्ग ) यांनी त्वरित लक्ष घालून सकाळी 06.00 ते सकाळी 09.00 वाजेपर्यंत व सायंकाळी 05.00 वाजता नंतरच्या एसटी बस सरळमार्गे सोडाव्यात. तसेच पणजी – वेंगुर्ला शेवटच्या एसटी बसचा कालावधी वाढवून तो सायंकाळी 05.00 वाजता ऐवजी 06.15 वाजता करण्यात यावा. व नोकरदार प्रवाशांची होणारी गैरसोय दूर करावी. अशी मागणी सिंधुदुर्ग जिल्ह्यातील प्रवासी वर्गाकडून करण्यात येत आहे. तरी महाराष्ट्र राज्य व गोवा राज्य शासनाने लवकरात लवकर पाठपुरावा करण्यात यावा. अशी मागणी सामाजिक कार्यकर्ते दिनेश मयेकर यांनी केली आहे.
